شمعدان من قشور البيض
طبعا هتسألي نفسك وتقولي "وإيه لازمة إني أعمل شمعدان من قشور البيض ما أنا عندي شمعدان شكله حلو"... هقولك بصراحة إن ده ممكن تعمليه على سبيل التجديد خاصة وإن الشمعدان اللي مستخدم من قشور البيض بيكون تحفة فنية جميلة أكتر من الشكل التقليدي المعروف للشمعدان وعلى فكرة مكوناته بسيطة وسهلة جدا ومش هتكلفك أي حاجة نهائي...
كل اللي هتحتاجيه :
• شمع.
• مقص.
• قشر بيض.
• ألوان ميه أو مانيكير.
• زيوت عطرية على حسب ذوقك... بس خدي بالك إنك تحطي شوية صغيرين من الزيوت العطرية دي وما تكتريش علشان لو كترتي هتدي ريحة مش حلوة..
• فتيل.
الطريقة:
1. هاتِ البيضة واقسميها إلى جزءين مع مراعاة أن يكون هناك جزء كبير علشان تستخدميه في وضع أكبر كمية من الشمع بداخله...بعد كده هات القشر ونضفيه كويس من جوه باستخدام الميه وخدي بالك إنك تنضفيه بشويش علشان القشر ما يتكسرش.. وبعد كده سيبيه شوية لغاية ما ينشف.
2. بعد ما ينشف القشر هاتيه وارسمي عليه أي رسمة أنت عايزاها أو لونيه باستخدام ألوان الميه أو باستخدام المانيكير أو سيبيه أبيض زي ما هو...بعد كده هات كرتونة البيض اللي عندك وحطي فيها القشر ده وده علشان تقدري تصبي فيه الشمع..
3. سيحي الشمع عن طريق عمل حمام مية .. "هات حلة صغيرة وحطي فيها الشمع وحطي الحلة الصغيرة في حلة أكبر منها فيها ميه مغلية وسيبيها على النار لمدة 5 دقائق أو لغاية ما تلاقي الشمع بدأ فعلا إنه يسيح داخل الحلة بعد كده ضيفي إليه الزيت العطري اللي عندك...
4. هات الفتيل وقصيه بالطول اللي أنت شايفة إنه مناسب لطول قشر البيض وحطيه جوه قشر البيض..بعد كده صبي عليه شوية شمع وسيبيه لغاية ما ينشف وبعد كده املأي ثلاثة أرباع القشرة بالشمع.. أو أكثر من كده وده لأن الشمع بعد ما بيبرد حجمه بيقل...بس كده خلاص.
